ኢትዮ ቴሌኮም በ67 ከተሞች አዲስ የ4ጂ ኤል.ቲ.ኢ አገልግሎት እንዲሁም በ27 ከተሞች ተጨማሪ የማስፋፊያ ስራዎችን በማከናወን አገልግሎት መስጠት ጀመረ

ኩባንያችን በ3ኛው ዙር የ4ጂ ኤል.ቲ.ኢ አገልግሎት ተደራሽ ለማድረግ በያዘው ስትራቴጂያዊ ዕቅድ መሠረት በ67 ከተሞች አዲስ የ4ጂ ኤል.ቲ.ኢ አገልግሎት እንዲሁም በ27 ከተሞች ደግሞ ተጨማሪ የማስፋፊያ ስራዎችን በማከናወን አገልግሎቱን መስጠት ጀምሯል፡፡

በተለይም በቴሌኮም ማዕከላዊ ምስራቅ ሪጂን በ6 ከተሞች፣ በማዕከላዊ ሰሜን ሪጂን በ13 ከተሞች፣ በምስራቅ ምስራቅ ሪጂን 7 ከተሞች፣ በምስራቅ ሪጂን በ8 ከተሞች፣ በሰሜን ምስራቅ ምስራቅ ሪጂን በ16 ከተሞች፣ በሰሜን ምስራቅ ሪጂን በ18 ከተሞች፣ በሰሜን ሰሜን ምዕራብ ሪጂን በ9 ከተሞች፣ በሰሜን ምዕራብ ሪጂን 16 ከተሞች እና በደቡብ ምዕራብ አዲስ አበባ ከፍተኛ የዳታ አጠቃቀም በሚታይባቸው 67 ከተሞች የ4ጂ ኤል.ቲ.ኢ አገልግሎትን ያስጀመርን ሲሆን በ27 ከተሞች ደግሞ የማስፋፊያ ስራዎች መስራታችንን ስንገልጽ በታላቅ ደስታ ነው፡፡

በዚህም መሠረት ኩባንያችን በአሁኑ ወቅት ጠቅላላ የ4ጂ ኤል.ቲ.ኢ አገልግሎት ተጠቃሚ የሀገራችን ከተሞችን ብዛት ወደ 181 ማድረስ የቻለ ሲሆን፣ በቀጣይም ከፍተኛ የዳታ አጠቃቀም በሚታይባቸው ሌሎች የሀገራችን ከተሞች የ4ጂ ኤል.ቲ.ኢ የሞባይል ኢንተርኔት አገልግሎት አዲስ እና ተጨማሪ የማስፋፊያ ሥራዎችን በማከናወን አገልግሎቱን የምናስጀምር ይሆናል፡፡

የ4ጂ ኤል.ቲ.ኢ አገልግሎት የላቀ ፍጥነትና ባንድዊድዝ እንዲሁም አስተማማኝ የዳታ አገልግሎት የሚሰጥ በመሆኑ ደንበኞቻችን አገልግሎታቸውን ዲጂታይዝ ለማድረግ፣ ምርታማነታቸውን ለመጨመር እና በአጠቃላይ የቴሌኮም አገልግሎት ላይ ያላቸውን ተሞክሮ በከፍተኛ ሁኔታ ለማሳደግ ያስችላቸዋል።