ኢትዮ ቴሌኮም የአምስተኛው ትውልድ (5ጂ) የሞባይል አገልግሎትን በምስራቅ ሪጂን በድሬዳዋ ከተማ አስጀመረ!!

ኩባንያችን ዘመኑ የደረሰባቸውን የቴክኖሎጂ ውጤቶችን ለማሕበረሰባችን ከማስተዋወቅ እና በሰፊው ተደራሽ ከማድረግ ባሻገር የሀገራችን የዲጂታል አገልግሎት ተጠቃሚነት ለማሳደግ የሚያስችሉ በርካታ ሥራዎችን በቁርጠኝነት በማከናወን ላይ የሚገኝ የሕዝብ ተቋም ነው፡፡   በአሁኑ ወቅትም የዘመናችንን አዳዲስ ቴክኖሎጂዎች እና የዲጂታል ሶሉሽኖች በፍጥነት እያቀረበ የሀገራችንን የዲጂታል ትራንስፎርሜሽን ራዕይ ዕውን እያደረገ ይገኛል፡፡ በተለይም በዓለም አቀፍ ደረጃ በተወሰኑ ሀገሮች ተግባራዊ የተደረገውን የዓለማችን የቴክኖሎጂ የመጨረሻ ደረጃ የሆነውን የአምስተኛው ትውልድ የሞባይል አገልግሎትን በሀገራችን የተለያዩ ከተሞች ተግባራዊ በማድረግ ላይ ይገኛል፡፡ በዛሬው ዕለትም ከዚህ በፊት በአዲስ አበባ፣ አዳማ እና ጂግጂጋ ከተሞች ለአገልግሎት ያበቃውን የ5ኛ ትውልድ የሞባይል አገልግሎት በምስራቅ ሪጂን በድሬዳዋ ከተማ በመዘርጋት በይፋ ማስጀመሩን በታላቅ ደስታ ይገልጻል፡፡

በዚህም መሰረት በድሬዳዋ ከተማ ባሉት አካባቢዎች በሰባት ቦታዎች ማለትም በሳቢያን ሁለተኛ ደረጃ ትምህርት ቤት፣ አሸዋ ገበያ፣ ከዚራ ቴሌ፣ ቢ-ካፒታል ሆቴል፣ በድሬዳዋ ፖሊ ቴክኒክ ኮሌጅ፣ በተስፋ ሆቴል እና በድሬዳዋ ዩኒቨርሲቲ ግቢ ውስጥ አገልግሎቱን አስጀምሯል፡፡

የ5ጂ አገልግሎት ስራ ላይ መዋል የቢዝነስ ደንበኞቻችን ምርታማነታቸውን እና የአሠራር ቅልጥፍናቸውን ወደ ላቀ ደረጃ ለማሳደግ፣ በዘመናዊ መተግበሪያዎች አማካኝነት አዳዲስ ገቢዎችን እንዲያገኙ ለማስቻል፣ የቢዝነስ ትንታኔን በቀላሉ በማግኘት ከንግድ ለውጦች ጋር በፍጥነት እንዲላመዱ እገዛ ለማድረግ ከፍተኛ ሚና ይኖረዋል፡፡ በተጨማሪም ተለዋዋጭ፣ ደህንነቱ የተጠበቀ እና ለተልዕኮ-ወሳኝ የሆነ ፈጣን የዳታ አገልግሎት እንዲያገኙ የሚያስችል ሲሆን፣ የማሕበረሰባችንን ሕይወት በማቅለል በኩልም የሚኖረው ፋይዳ የጎላ ነው፡፡የ5ጂ የሞባይል አገልግሎት ለዘመናዊ ቤት (Smart home) ፣ ለስማርት የጤና አገልግሎት እና የሆስፒታል አስተዳደር፣ ለስማርት ግብርና፣ ትምህርት፣ ማዕድን፣ ማኑፋክቸሪንግ፣ ለስማርት ኤርፖርትና የጉዞ አገልግሎት፣ ለስማርት ትራንስፖርት፣ ለብሮድካስቲንግና ለመዝናኛ እንዲሁም በክላውድ ላይ ለተመሰረቱ የ5ጂ ጌሞች ከፍተኛ ጠቀሜታ ያለው የዘመናችን የመጨረሻው ቴክኖሎጂ ነው፡፡

የ5ጂ የሞባይል ኔትወርክ አገልግሎት እስከ 10 ጊ.ባ በሰከንድ (Gbs) የሚደርስ ከፍተኛ ፍጥነት ያለው፣ ዳታ የማስተላለፍ መዘግየትን እጅግ በላቀ ሁኔታ በመቀነስ (Ultra-low latency) ወደ 1ሚሊ በሰከንድ የሚያደርስ ነው፡፡ በተጨማሪም በአንድ ካሬ ኪሎ ሜትር ውስጥ እስከ 1 ሚሊዮን የሚደርሱ በርካታ የቴክኖሎጂ መሳሪያዎችን እርስ በርሳቸው ለማገናኘት የሚያስችል ዓለማችን የደረሰበት ዘመናዊ የገመድ አልባ ኔትወርክ ቴክኖሎጂ ነው፡፡

በተለይም ወሳኝ ተልዕኮ ላላቸው (Mission Critical) እና በተመሳሳይ ወቅት (real time) መከናወን የሚፈልጉ አገልግሎቶችን ለአብነትም የማምረቻ ፋብሪካዎች፣ ግብርና፣ ህክምና፣ ለመሳሰሉ ኢንዱስትሪዎች እጅግ የላቀ ፋይዳ አለው፡፡ እንደ ሹፌር-አልባ ተሽከርካሪዎች (self-driving vehicles) ፣ Internet of Things የመሳሰሉ ቴክኖሎጂዎችም በተግባር እውን እንዲሆኑ የሚያስችል አስተማማኝ የዘመኑ ቴክኖሎጂ ነው፡፡

ኩባንያችን ለክቡራን ደንበኞቹ የ5ጂ ያልተገደበ ዳታ፣ የመደበኛ የመኖሪያ ቤት ዳታ እንዲሁም የተለያዩ የ5ጂ ጥቅል አማራጮችን ያቀረበ ሲሆን፣ ደንበኞች የ5ጂ አገልግሎትን መጠቀም በሚያስችሉ መሳሪያዎችና ቀፎዎች አማካይነት አገልግሎቱን የሚችሉ መሆኑን በታላቅ ደስታ እንገልጻለን፡፡ 

ኢትዮ ቴሌኮም

ጥር 18 ቀን 2016 ዓ.ም